ثمار اول ١٠ ايام من تحدي ال٢٩ يوم

 ويا كلّ الهلا 😁😊

انا عدتعلّم (خط الرقعة) ف يومياً امارس الخط اقل شي ساعتين الى ٣ او ٤ ساعات ، هدفي هو تعلّم خط الرقعة وخط الوسام ، ثلثين وقت التحدي خط رقعة والثلث الاخر خط وسام .

 كملت تعلم حروف خط الرقعة بواسطة قلم "الخطاط" استخدمت صور عن خط الرقعة توضح بيها كل حرف كم نقطة حجمو وارتفاعو ، تكدر تبحث عنها بگوگل باسم (قواعد حروف خط الراقعة) ،، تعلّمي لحروف خط الرقعة يعتبر كللش ممتاز خلال ١٠ ايام ولكن انا احس انو الوقت الي عدقضي بالخط قليل يومياً لازم شوية ازيد واضغط على نفسي حتى اتعلم واتقنو بشكل احسن.

كل هاي علمود اتعلم حروف خط الرقعة

 خلال اخر يوم من هاي ال١٠ ايام كتبت كل حروف خط الرقعة مرة ثانية علمود اراجع نفسي باللي تعلمته ،، صراحةً التحدّي علمني انو كلشي تشوفو صعب هوا بالحقيقة سهل ولكن ينرادلو بس انو تسعى عليه وبذل جهد حتى تحققو ، يعني انا كنت متخيل تعلّم الخط صعب وينرادلي دورات ومدرسين ولكن بس شاركت بهذا التحدي  وقمت اتعلم خط بالبيت شفت انو سهل كللش بس ينراد الشخص يتحرّك للشي الي يريدو ما يضل واقف بمكانو وبس يتمنى .

الشي الحلو والي فاجئني هوا انو مرتضى وفريق التحدي كللش عجبتهم مدونتي الأولى ورادوني بالاجتماع ولكن كنت ما موجود مع الاسف ، والشي الاحلى هوا ردود فعل المشاركين بالتحدي من كتبت اسماؤهم و الحمد لله عجبتهم كللش وانطوني طاقة ما طبيعية بكلامهم الحلو

١٤ اسم من اسماء المشاركين معانا بالتحدي ❤️

 

 بما انو كلمت تعلم خطوط الرقعة بهاي ال١٠ ايام بقلم "الخطاط" ف هسا راح  اغير الخطة وابدي اتعلم اتصالات حروف خط الرقعة ولكن باستخدام  "قصبة الخط"  اللي تنطي شكل احلى وحواف حادّة .

 

ان شاء الله اكمّل بهذا التحدي وازيد من الوقت الي عدقضي بهذا التحدي واكيد جهد اعلى = ناتج احلى.

واخر شي كتبت هذا المقتبس من الاغنية العراقية المشهورة كللش عند العراقين واختاريتها لان بيها تقريباً كل الحروف وحتى تعتبر مراجعة الي .

١- كللش ممتن لمحمد صادق و طارق محمد ولكل المشاركين بالتحدي على تشجعيهم الي .

٢- ممتن لمرتضى و ريهام العاني على كلامهم الحلو واليخبل .

٣ - ممتن لأبي على تعليمي للخط واللي حببّني بيه من انا وصغير 😍.