نهاية تحدي ٢٩ يوم

- أغسطس 01, 2021

( حاملاً كلّ ابجديات السلام منها جئتُ ، حيث آشور والحضارة ، حيثُ الحدباء والمنارة )

ويا كلل الهلا🙋‍♂️

أشونكم؟ انا عبيدة أشرف مذخر ، من الموصل وهدفي بهذا التحدي كان تعلّم خط الرقعة وحروف خط الوسام.

عَلى قدرِ أهْلِ العَزم تأتي العَزائِمُ

اول ايام التحدي بديتها بعزم ‏وقوة وكنت كثير اشتغل على نفسي بالتحدي و اضل اتمرن واكتب حروف وكلمات بخط الرقعة بمعدل ٣-٤ ساعات يومياً وثمار اول ١٠ ايام كانت جملة وحدة بالإضافة الى ١٤ اسم من المشاركين :

فرحة كانت ما توصف

وثاني ١٠ ايام بديت ب اتصالات حروف خط الرقعة وهم اتمرن ٢-٣ ساعات يومياً وصرت ابدال ما اتدرب صفحة كاملة علمود جملة وحده ؛ صرت اكتبها باول او ثاني محاولة وتضبط معايه ، وكتبت كومة جمل واكلمات واقتبساتات لحد ما حسيت ايدي عتاخذ قالب خط الرقعة ، وهاي شوية منها :

بعد ما كمّلت حروف واتصالات خط الرقعة ف صرت اقرأ ملزمة بعثلياها احد المشاركين عن قواعد خط الرقعة بيها ملاحظات تفيد كللش وتحتوي على كل الخطوط العربية .
اغلب الاقتباسات الي اقلدها ، اخذها من "كلمات الخطاطين"
وتابعت فيديوات عاليوتيوب لتعليم خط الرقعة للخطاط "احمد الاغا"

واخر ١٠ ايام كانت اطيب ايام التحدي اول ما بلّشت بخط الوسام وبعد ما متعلم الحروف اصلاً سويت هاي اللوحة :

حتى انا ما توقعت راح تطلع هلگد حلوة وفرحت كللش من كملتها وبعثتها للگروب وعجبتهم وانطوني طاقة كبيييرة تعلّمت بيها حروف خط الوسام عن طريق ملزمة مجانية من "هذا الموقع" وبيه ملزمة مجانية ايضاً لخط الرقعة ، بس اطبعها واتمرّن عليها .

كللش مقهور لان خلص هذا التحدي وبنفس الوقت فرحان كللش بالانجازات الي سويناها نحنا المشاركين 💪🏻❤️‍🔥 ، صراحةً بهذا التحدي تعرفت على كومة اصدقاء اذكياء مبدعين طيبين حلوين ما تمل من السوالف معاهم❤️✨

قبل ما ابدي كنت كللش اريد اتعلم خط الرقعة وخط الوسام بس كنت مستصعب الامر وما عندي واهس ، اجا مرتضى سوالنا التحدي وخلانا غصب مما عنا نتعلم الشي الي نريده واجه بوكته صراحةً. (:

نصيحة گوم اتعلّم اي شي حرفياً اي شي لا تضل بمكانك تنتضر ، وشلون تقضي على الكسل؟ سوي اي شغلة تجي ابالك يعني مثلاً غير ديكور الغرفة ، روح رتب الحديقة ، اشغل نفسك دائماً كون مشغول الى ان يروح الكسل وتگوم تركض ركض بحيث تصل مرحلة تضوج لان گاعد وما عندك شي (:
اي شي تريد تتعلمه بالحياة او تريد تسويه ابد مو صعب ، بس حط هدفك وخطة مناسبة وخللص ، ضل اشتغل عليه الى ان تكمله وصدگني من تكمل راح تگول ،، (شگد سهل واني مصعبة على نفسي) .

❤️‍🔥

ابد ما كنت متخيل هلگد راح اكتب واتمرن

بنهاية هذا التحدي وبعد ما كملت خط الرقعة وخط الوسام حبيت اسوي مشروع تخرج من هذا التحدي العظيم ، وفكرّت بشي يجمع بينهم ف إجت ابالي هاي الفكرة ، ردت اكتب اسماء المشاركين بس شفت ما تكفي فطبعت اسم التحدي بخط الرقعة لان ماكو قلم بهالحجم 😂 وحشيتها حروفيات بخط الوسام و بهاي اليومين الي اشتغلت بيهم المشروع جنت كللش مريض ، نشلة قوية واحتمال كبير كورونا😁🥲 ف نصيحة قللو الطلعات وابتعدو عن التجمعات والتقبيل 💚🙏🏼

هذا الفيديو يلخص مشروع التخرج 👨‍🎓 😁❤️‍🔥

شكراً كثييير كثييير ميسم على هذا المونتاج وعاشت ايدج❤️‍🔥🙏🏼 .

(وحدة من المبدعين معانا بهذا التحدي✨)